الرئيس السيسي: المراة المصرية رقيقة وحساسة وإحنا كرجالة مبناخدش بالنا من ده

هنأ الرئيس عبدالفتاح السيسي، الشعب المصري باحتفالية المراة المصرية وشهر رمضان الكريم، موضحًا: "هاخد من كلام المذيع أحمد رأفت وكلامه مع الناس في الشارع وأهلنا الطيبين، وهبدأ بكلمة قالها وهي إن الست المصرية صعبة شوية ولا حاجة؟ لأ، هو الفكرة إن الست إنسانة رقيقة وحساسة وإحنا كرجالة مبناخدش بالنا من الحاجات دي".

وأضاف رئيس الجمهورية، في كلمته خلال احتفالية المرأة المصرية والأم المثالية لعام 2023، التي يحضرها مع قرينته السيدة انتصار السيسي، وتنقلها فضائية «إكسترا نيوز»: "ربنا خلقها كده، وإحنا لو فهمنا كرجالة، لو هموا كويس يخلوا باله من كلمته او تصرفه في أي مرحلة عمرية من الصغر إلى الكبر، ولو انتبه للنقطة دي واتعامل في الشغل كده مع زميلته أو اهل بيته، مش هيحصل رد الفعل اللي ممكن يبقى مش متوقعه أحيانا .. هو مش عارف بيعمل ايه".

وتابع، ان النبي محمد صلى الله عليه وسلم لما حصل إن ستنا (يقصد إحدى زوجات الرسول) ضربت الوعاء الذي كان به الأكل سقط وكُسر، وكان ذلك أمام الصحابة، وتناثر الطعام عليه صلى الله عليه وسلم: "إحنا منجيش حاجة خالص، تصوروا أي حد مننا، كان ممكن يبقى رد فعله .. لكنه قال كلمة جميلة جدا، وهي غارت أمكم، يعني ده رد فعل لغيرتها، وده مقبول، ولو الزوج عارف كده في الشغل أو في مناسبة يطبطب عليها ويخلي باله، ولما يحصل حاجة يطول باله وياخدهم في جنابه ويسكت كده يعني، انا بتكلم معكم كأهلي ويوم جميل وأسرة بنتكلم".