قاتل طبيب الساحل في التحقيقات: « فشلنا في إنقاذ أسامة.. ونفسه راح من المهدئات»
تستكمل "قضية رأي عام" في نشر أقوال المتهمين في قضية مقتل طبيب الساحل، حيث كشف أحمد شحته تفاصيل جديدة في القضية وفقًا لنص التحقيقات، وجاءت أقواله أمام جهات التحقيق، كالتالي:
أسامة اتوفى مننا حوالي الساعة 3 الفجر، بعد ما فشلنا في إنقاذه لما نفسه راح خالص من كتر المهدئات، وفضلت قاعد ساكت أنا واحمد مبنتكلمش خالص، وقعدنا لغاية الصبح مش عارفين نعمل ايه، ومكنش فيه حل قدامنا غير إننا ندفنه في الحفرة، وساعتها أحمد فرج ساعدني وخلعنا باب الحفرة، وردمنا عليه وغطينا الحفرة بورق حائط.
وأضاف: الصبح مش فاكر امتى بالظبط كنا خلصنا قصة الدفن وأنا مشيت، وأحمد مشي هو كمان، وأنا بعديها بيومين روحت الشغل، فلقيت زمايلنا بيسألوا عن أسامة صبور بس محدش سألني شخصيًا، فأنا ساعتها قلقت وطلعت على المنيا قعدت عند واحد صاحبي، ومسحت كل المحادثات بيني وبين إيمان المحامية، عشان ساعتها كنت باعت لها رسايل متعلقة باللي حصل، والمباحث جات ومسكتني وسألتني على اللي حصل وأنا حكيتلهم وده كل اللي حصل.
