علشان يسرق حلق.. التفاصيل الكاملة لمقتل مسنة على يد جارها في القليوبية
«كانت أم وأب لنا» بهذه الكلمات عبرت ابنتا «نوال حسين»، 65 سنة، والتي راحت ضحية طمع جارها الشاب الذي أنهى حياتها بمنزلها في قرية القشيش التابعة لمركز شبين القناطر في القليوبية بـ20 طعنة ليسرق حلقها وبعض الأموال الزهيدة.
وقالت ابنتها فاطمة عبد العزيز: «أمي عندها 65 سنة وهي اللي ربتنا أنا وأختي كريمة بعد وفاة والدنا من 17 سنة وكانت هي الأم والأب، وتعبت علشانا لحد ما كل واحدة فينا اتجوزت وراحت بيتها وهي أصرت أنها تعيش في بيت أبويا لوحدها وكنا بنزورها بانتظام».
وأضافت: «أنا كنت قاعدة معها علشان كنت بعمل شغل في بيتي وقبل الواقعة بأسبوع روحت بيتي وتركتها بمفردها وليلة الجريمة كلمتها وكانت بتزور أختي الصغيرة كريمة».
وبكت وهي تقول: «مكنتش أتخيل أن دي آخر مكالمة بينا وإنها تانى يوم المجرم هيقتلها علشان يسرقها، طيب كان سرق اللي عايزه وتركها لينا تسندنا فى الدنيا».
وعن الجريمة قالت: «فوجئنا الساعة 6.30 الصبح بالجيران بيتصلوا علينا وبيقولوا في حريقة فى بيت أمكم ولما روحنا لقيناهم نقلوها لبيت الجيران اللى قصادنا وكلها إصابات فى وشها ولما روحنا للدكتور قالنا انها توفيت والمباحث جت وعرفنا أنها مقتولة وحلقها اتسرق وأموال قليلة كانت فى الصندوق بتاعنا».
