• الرئيسية
• السوشيال

بعد لقاء المطربة ايناس عز الدين برنامج اوضة ضلمة تقديم الاعلامية انجي هشام علي قناة هي

نشرت المطربة ايناس عز الدين عدة منشورات

بداية

انا أقوى من أي حاجة في الدنيا و حتى دموعي دموع قوة و عزة و فخر بنفسي و بما انا عليه وبتربية ماما ديداً رحمة الله عليها ليا

انا بتوجع آه .. بقع آه .. بتكسر آه .. بس أتدمر و أنتهي بفضل الله لأ مافيش حاجة في الكون تقدر تعملها

تخيلوا معايا كده للحظة

الطفلة الصغيرة اللي إتحرمت من الحنان لما تكبر تملا الدنيا حنان لدرجة إن بيتها يتحول لملجأ حيوانات ضالة و أصحاب حالات خاصة و تتكفل بيهم من قوت يومها من غير ما تاخد مليم من حد لو هتجوع تأكلهم و تعالجهم

الطفلة اللي كانت بتدور على حضن الأب و الأم وما تلاقيهوش و تلاقي قصاده ضرب و عنف و سب و إيذاء جسدي و نفسي و إبتزاز عاطفي و مادي ولما تشتكي إن حد أذاها بدل ما يجيلها حقها تتعاقب هي بأسوأ طرق العقاب اللي ممكن العقل ما يتصورهاش تحولت لإنسانة ماشية توزع أحضان و حب وكلام حلو على كل الناس اللي تعرفه واللي ما تعرفوش مش بس كده دي بقت فنانة بتقف على مسرح و الضحكة على وشها من الودن للودن و تسعد الناس و تتنطط و ترقص كأن قلبها ما داقش يوم طعم الوجع

الطفلة اللي إتسرق منها طفولتها و برائتها و شبابها و إبتسامتها و كل ذكرياتها الجميلة و إتحط مكانهم ذكريات القلب مش متحملها لدرجة إن الست اللي ربتها كانت بتقوم بمليون دور و بتتشقلب و تعمل المستحيل و حاطة في بؤ البنت معلقة دهب علشان تعوضها كل المشاعر اللي فقدتها و بزيادة كمان أكتر من اي مخلوق بس غصب عنها فيه مشاعر بنستناها من الأهل نفسهم ولو ما جاتش منهم بنحسها ناقصة لو اللي قدامنا قادوا لينا الكون كله شمع بس الطفلة دي برغم الإيذاء ده كله لما كبرت مش بتأذي حد بالعكس دي قافلة حياتها على نفسها و على بيتها مالهاش اصحاب مالهاش حد و برغم معرفتها بكل الناس و حبها ليهم عمرها ما طلبت مساعدة من حد في شغلها او في اي حاجة لانها خايفة تخسرهم لان قلبها ما اتملاش بالكره برغم انها داقته عمرها كله

ازاي حد ممكن يقول على الطفلة دي بعد ما تكبر انها غلط و انها مش بطلة انها لسه عايشة و ان الدنيا ما لوثتهاش بدمها اللي دبحتها بيه وان كانت الدنيا كل ما تدبحها كانت تطهر نفسها بالحب و الرحمة و تتمادى فيهم اكتر

انا راسي مرفوعة بنفسي جداً اني ما تحولتش لنسخة من جلادي ✋????

ووجهت رسالة الي المغفور لها جدتها

سيبتيني لمين بس وإنتي عارفة إنك كنتي سبب حياتي و نجاتي طب كنت بستقوى بيكي على الدنيا اللي عمالة تشيل وتحط فيا و تدوس عليا طب دلوقتي أستقوى بمين انا نفسي مقطوع من يوم ما سيبتيني ماحدش في الكون عارف انا عشت إيه و مريت بإيه غيرك حتى الواحد في المليون اللي قولته و خاضض الناس كلهم ماحدش يعرف انه ولا حاجة و صفر قصاد الحاجات اللي إنتي الوحيدة اللي عارفاها و اللي عديت منها بفضلك وبسبب وجودك في حياتي ومن بعدك كل الذكريات والوجع بيطاردوني تاني انتي كانت لمسة منك بتشفيني و تنسيني بس دلوقتي انتي مش موجودة وسبتيني لأكتر ناس أذوني في حياتي و دمروا ذكرياتي و ماضيا و مستقبلي وبسببهم بعاني

عايزة اصرخ بعلو صوتي يا أمي لحد ما أحبالي الصوتية تتقطع أو أجيلك و أتطمن بحضنك من تاني