ليلي علوي: « قررت السنة دي مشتغلش دراما خالص واهتم بالسينما »

لم تتمالك الفنانة ليلى علوي دموعها أثناء حديثها عن والدتها الراحلة.

وخلال حلولها ضيفة على برنامج "كلمة أخيرة" من تقديم الإعلامية لميس الحديدي حكت عن علاقتها بابنها "خالد" وارتباطها الكبير بيه.

وقالت ليلى علوي: "كنت بتصل بابني وأسأله أنت فين وصلت ولا لسه، بس بقالي سنة ونص مش بعمل كده بمنع نفسي عشان مسببلوش قلق، أنا اتربيت كده وغصب عني الحب اللي جوايا ليه أني عايزة أطمن عليه كل ثانية".

وتابعت متذكرة والدتها الراحلة وبكت قائلة: "ماما الله يرحمها مكنتش بتنام غير لما اروح البيت أيا كانت الساعة، قعدت أقولها أنا كبرت كفاية، لما هي مشيت وأنا سافرت الساحل وقفت وعيطت لأنها مكنتش بتكلمني تتطمن عليا".

وأكملت موجه رسالة لابنها: "يا ولاد متزعلوش مننا دا حب أحنا بنحبكم أوي وبنخاف عليكم وبندعيلكم".

وخلال الحلقة كشفت ليلى علوي سر عدم تقديم مسلسلات هذا العام.

وقالت ليلى علوي: "أنا قررت السنة دي مشتغلش دراما خالص واهتم بالسينما ويمكن علشان أنا متوفقتش بالدراما".

وأضافت: "السينما مريحة عن التليفزيون وأنا زهقت من التمثيل بسبب شغل الـ30 حلقة في المسلسل، يعني أنا مثلا النهاردة اشتغلت من 7 الصبح وخلصت 7 بالليل وساعات بنشتغل الـ24 ساعة".