اتهامات بالسرقة.. القصة الكاملة لأزمة عمرو مصطفى ورامي صبري بسبب أغنية ”يمكن خير”وحذفها من ”يوتيوب”

أعلن الفنان عمرو مصطفى المُتسبب في حذف أغنية “يمكن خير”، للفنان رامي صبري، مؤكد على أنه سيتخذ إجراءات قانونية ضده.
وذكرعمرو مصطفى في تصريح صحفى: أنا اللي حذفت أغنية يمكن خير لـ رامي صبري وهتخذ إجراءات قانونية ضده من بكرة، ومش هقدر أقول أكتر من كده عنه.

أزمة عمرو مصطفى ورامي صبري

ويذكر أنه قد تفاجئ نشطاء مواقع التواصل الاجتماعي بحذف أغنية “يمكن خير” من موقع الفيديوهات الشهير يوتيوب، بعد إتهام عمرو مصطفى له بسرقتها.

ورد رامي صبري على إتهام عمرو مصطفى قائلًا: أنا عشان فيه بيني وبينه عشرة مش هتكلم بطريقته .. هو قال إني سرقت وأعتقد إنه لو يعرف رامي صبري كويس هيعرف إنه مسرقش والفنان المبدع الحقيقي مبيسرقش في فرق بين السرقة وتوارد الأفكار بمعنى إني ممكن أجبلك دلوقتي ١٠ ألحان في منهم جملة شبه التانية”.

وأوضح: “يعني أنا مثلا زمان عملت أغنية للفنان عامر منيب اسمها “ ده مكانش حب وهندم ليه؟” بعدها بسنة عمرو دياب عمل أغنية الملحن بتاعها محمد يحيى بتقول أي حاجة تيجي من ريحة الحبايب.. و ده مش عيب وأنا ساعتها مطلعتش قولت أنا هتخانق مع محمد يحيى وهرفع قضية”. وأضاف: “الكلام الكبير اللي عمرو مصطفى قاله ده كلام يدينه كلمة سرقة دي عيب لما ملحن كبير زي عمرو مصطفى يطلع يقول على فنان تاني ملحن مش صغير ومطرب مش صغير ومكانته مش صغيرة في هذا الوسط ويتكلم عنه بشكل مش حلو”.

وتابع: “هو مشكلة عمرو مصطفى مش أغاني لأن لو حد فينا سرق حاجة من عمرو مصطفى هيقاضيه وهياخد حقه بالقانون لأنه كلية حقوق وأنا معهد موسيقى عربية قسم تأليف موسيقي فلما تيجي تتكلم عن متخصص وأنت كلية حقوق لازم تبقى عارف إنت بتتكلم عن مين متقولش أي كلام كده”.

أزمة عمرو مصطفى ورامي صبري

وأكد: “وأنا لو ركزت معاه هيتحاسب قانونيا يعني أنا بس مكبر دماغي واللي يهمني الشغل وأطلع ملك الفرفشة وأبقى لذيذ أنا بحب الطريقة دي إنما عمرك شوفتيني بطلع أتخانق أو برد على حد؟ وعمري هرد عليه بطريقته”. ووجه رسالة إلى الفنان عمرو مصطفى قائلا: “هقوله ربنا يهديك .. واشتغل واعمل حاجات جديدة زي الملحنين الكبار زمايلك اللي بيشتغلوا دلوقتي ركز في شغلك أكتر واعملنا أغاني حلوة وأنا شخصيا لو عملتلي أغنية هغنيها ومعنديش أي مشكلة معاك إنما الكلام اللي قولته كلام صغير عيب يطلع من واحد كبير زيك.. السرقة دي إني آخد حاجة من ١ ل ١٠ ولو حد اتسرق منه حاجة مبيسكتش.. أنا لما قعدت وركزت معاه اكتشفت إن هو مش على حق كقانون مش حقه إنه يطلع يقول ده سرق مني”.

واختتم حديثه قائلا: “هو عمرو مصطفى لما بيغير من نجاح بيطلع يخبط في الناس مفيش حد فينا عجبه خالص كلنا واقعين ومبتعملش أغاني حلوة وكلنا أغانينا مسروقة منه .. أنا اتضايقت منه جدا على فكرة لأن أنا مبحبش التقليل من قيمة الناس ممكن تقول إني مبعجبكش أو أغانيه وحشة أو مش نجم تمام ده رأيك إنما تطلع تقول إنت سرقت مني دي كلمة كبيرة أنا راجل دارس موسيقى ومتخرج من المعهد العالي للموسيقى العربية زي عمر خيرت وياسر عبد الرحمن موسيقار يعني ومش هعمل اعلانات ومش هتكلم عن نفسي كتير .. الأستاذ مش زي الطالب مش هتسأل رامي صبري ده دارس إنما هو بيتكلم غلط أنا لو راجل عندي مشاكل نفسية مكنتش خليته يشتغل تاني إنما أنا مهذب ومحترم ومتربي كويس”.