محمد ثروت يكشف الحالة الصحية لنجله: مرضه صعب جدًا.. الصحة بالفعل تاج على رؤوس الأصحاء

كشف الفنان محمد ثروت تفاصيل الحالة الصحية لنجله المخرج أحمد ثروت، بعد تعرضه لوعكة صحية مؤخرًا، مؤكدا أن مرضه صعب لكن هو في تحسن.

وقال محمد ثروت خلال مداخلة هاتفية ببرنامج “مساء دي إم سي”: ربنا أراد إن ابني بفضل دعوات الناس يرجع يقف على حيله تاني، وربنا ما يحكم على حد بالمرض، والصحة بالفعل تاج على رؤوس الأصحاء لا يعرف قيمتها إلا المرضى.

وأوضح: أحمد بدأ في المشي خلال الأيام الأخيرة وكانت لحظات مؤثرة في حياتنا، المرض بتاعه صعب ولكن احنا عندنا صبر واحدة واحدة هيرجع تاني.

أحمد ثروت يعلن تعافيه من المرض

في وقت سابق كان قد أعلن المخرج أحمد ثروت عن تعافيه من المرض بعد صراع أكثر من 160 يومًا، مشيرًا إلى أنه بدأ في الحركة بعد مئات المحاولات.

ونشر أحمد ثروت عبر حسابه الشخصي بموقع التواصل الاجتماعي “انستجرام”: الحمد لله كرم من ربنا و بفضل دعواتكم انهاردة بعد ١٦٠ يوم صراع مع متلازمة ميلر فيشر، اول يوم انجح اني اقف تاني علي رجلي بعد عشارت الاسابيع ومئات المحاولات. وأضاف: اتعلمت كتير من اختبار ربنا ليا، اتعلمت الرضا والحمد علي كل حال وان ستر ربنا علينا فوق كل شيء ومدي تحملك بيجي معاه كرمه ليك فالاخر وانه مش هيخذلك طول مانت مسلم امرك وان عادي ممكن ابتدي تاني كل حاجة من الاول وان لسه في امل طول ما في حياة. وواصل: ربنا الهمني في اول الاصابة اني اوثق الاختبار دة من اول يوم حتي الان، ودة عشان اول ما اقوم ان شاء الله اتمني اكون سبب ف التوعيه لمثل هذه الامراض النادرة وازاي لو لقدر الله اتصابت انت بيها او حد قريب منك تتعامل معاه ازاي لأن جزء كبير من التعافي هو الحالة النفسية للمصاب. واستكمل: حابب اقول حاجة من قلبي بجد، الكرم الي ربنا كرمني بيه دة نور لي حاجات كتيرة، خلاني اقعد مع نفسي اقيمها وعرفني قيمة نعمة نعمة هو مديهالي زي اني ادخل الحمام لوحدي او اعرف اكل لوحدي او امشي خطوة او حتي اتحكم ف جسمي والي معظم الناس ماتعرفوش اني كنت فقدت بصري لاسابيع ف عيني اليسري وفقدت القدرة علي التحكم فالكلام لاكثر من شهر.


وأختتم أحمد ثروت قائلًا: كل يوم كنت بسأل نفسي وانا في ظروف دي لو ربنا افتكرني هو انا قدمت ايه لكل الي حواليا؟!…و وصلت دلوقتي ان بقي عندي هدف اكبر من اني انجح او اشتغل لنفسي بس، خلي عندي احساس بحاجات قيمتها لما دخلت فيها وحسيت بيها زي مثلاً واحد جالة المرض الي صابني ومش عارف وفاكر ان عنده مرض تاني وتوفي عشان عنصر الوقت لم يسعفه او مريض تاني عرف التشخيص ومعهوش فلوس العلاج نظراً ان العلاج بتاع الامراض المناعية زي حقن الاجسام المضادة غالية جداً… ان شاء الله قريباً جداً هقول عن حاجة شغال عليها هتخفف المعاناه عن اي حد محتاج مسانده او مساعده ويارب ربني يقدرني وماشوفش حد يدخل ف اختبار زي الي انا مريت بيه.