رسالة الإعلامى ”أسامة منير” لــ وزير الكهرباء: حالنا واقف والدنيا خربانة.. ايه الحكاية؟

أعرب الإعلامي أسامة منير عن استيائه الشديد من أزمة انقطاع الكهرباءمؤكدا على أن الوضع أصبح في حالة حرجة وشركة الكهرباء بم توضح بيانها.

وصرح أسامة منير في فيديو منتشر على مواقع التواصل الاجتماعي: آسف إني بصورلكم في الضلمة لأني معنديش كهرباء في المكتب، الكهرباء قطعت، وعايز أسأل الامتحان اللي نزلتهولنا وزارة الكهربا بورقة المواعيد، دا معناه أيه، دي حاجة ما خدنهاش في المنهج هنجاوب عليها أزاي، بما أن المنهج كان صعب أوي للدرجة دي، عايز أسأل حضراتكم وممكن تجاوبوني، هي من إلا عشرة إلى و10 هتقطع، ولا من إلا عشرة هتقطع ساعة.

وأوضح: أو و10 هتقطع ساعة، أو من إلا عشرة حتي و10، أو أي وقت هتقطع ساعة، طيب من إلا عشرة حتي وعشرة أي ساعة. يعني الصبح الظهر أو بالليل، طيب خلوا التحميلات دي... مش عارف، أحنا حالنا واقف، عندي حاجات مش عارف أصورها، حاجة تحزن، دي أشغال وشركات والدنيا خربانة، أنا النهاردة مينفعش أبقى عايش بالشكل دا، وعندي سؤال (هو انقطاع الكهرباء بقى رسمي؟) أول مرة في حياتنا نشوف انقطاع الكهرباء بقى معتمد بجدول، هو أحنا وصلنا للجدول وصلنا لأن يكون انقطاع الكهرباء بجدول رسمي.

وتابع: المستشفيات اللي فيها عمليات جراحية، والناس اللي علي أجهزة تنفس صناعي، والناس اللي في العناية المركزة، والأطفال المولودة وكبار السن، هنعمل فيهم أيه.. دي مصيبة في حد ذاتها!".

لافتا: "الحمد لله طبعًا ونشكر ربنا، إن حفلة الأستاذ تامر حسني والاستاذ عمرو دياب لم ينقطع فيهم الكهرباء، لأن لو انقطعت الكهرباء في الحفلتين كان حدث تحرشات، وكانت بقيت مجازر في الحفلة.

وأختتم أسامة منير قائلًا: أسأل وزير الكهرباء يتعطف علينا ويصور لنا فيديو يشرح لنا فيه الوضع لنتعاطف معك ونتحمل، كلنا نقدر نتحمل المسئولية وكلنا بنحب بلدنا ونتحمل بلدنا وعايزين نشوفها أحسن بلد في الدنيا، لكن شاركونا الحدوتة، والفكرة، علشان نفهم.