أزمة قبل رمضان 2024.. «الذهب الأبيض» سر اختفاء السكر

هل تحول السكر لذهب ابيض .. هل اصبح عملة صعبة .. يا ترى ايه سر أزمة إختفاء السكر .. لم يعد للشارع المصرى حديث سوى الكلام عن اسعار السكر ولغز اختفاؤه من الاسواق، وتضاربت أقوال الجميع حول هذه الأزمة ، وراح كل طرف يلقى بالتهم على الاخر، فاتهم المواطنون التجار بالجشع والطمع واالاحتكار، بينما اعلن التجار تبرئهم من هذه التهم واكدوا ان السبب الرئيسى فى اختفاء السكر هى الحكومة التى لم تستطع السيطرة على الأزمات

وقالوا إن عودة إختفاء السكر في الأسواق هذا الشهر سببه قلق ومخاوف التجار وعدم ثقتهم في الطريقة التي يتعامل بها معهم رجال الشرطة..

الغريب بقى ان السكر أصبح عملة نادرة فى الأسواق وكل يوم فى الزيادة .. المصيبة الكبيرة ان السكر دخل السوق السودا ويعالم بقى هيطلع امتى منها، انما اللى مش غريب ان ده يحصل قبل دخول شهر رمضان بأسابيع ، وده يأكد ان فى ايادى خفية بتلعب بالسكر وهتجنن أسعاره

طيب الناس كلها بتسال هو سعر السكر هيروح فين تانى .. والستات بتضرب كف على كف وبيقولوا احنا مش لافيين السكر اللى بـ 60 جنيه .. ومش هينفع نعمله مقاطعة مفيش بيت فى مصر يقدر يستغنى عن السكر

طيب طبعا انت عاوز تعرف تفاصيل الخناقة اللى بين التجار والحكومة بسبب السكر ايه .. تعالى وانا اقولك

التجار قالوا احنا ملناش علاقة من قريب او بعيد بموضوع اختفاء السكر ده واكدوا ان المسئول عن غياب السكر ده هم الناس المسئولة عن التوزيع والمداهمات البوليسية للمخازن، وكمان اعترفوا ان فى تجار معندهمش ضمير ليهم يد فى الموضوع ده بس دول نسبة قليلة جدا

وكمان قالوا ان بطاقة التموين بتغطي 70 مليون مواطن، وبياخدوا السكر بـ 13 جنيهًا على البطاقة التموينية.وكمان البطاقة اللى عدد افرادها اكتر من 3 بياخدو كيسين سكر بـ27 ، وطبعا الكلام ده صحيح بس مفيش اسرة عندها اكتفاء ذاتى للسكر اللى بتاخده على بطاقة التموين وعشان كدة بيضطروا يشتروا السكر الحر اللى سعره كل يوم بحال

طيب هى مصر بلد منتجة للسكر .. أيوة طبعا وكمان بتغطى 80% من الاستهلاك المحلي، ولا يتجاوز الاستيراد السنوي للسكر 700 ألف طن،

طيب فين المشكلة استنى معايا وانا اقولك .. اللى بيحصل ان التجار الكبار بياخدوا كميات كبيرة من السكر وبعد كدة بيوزعوه على المحافظات للتجار الصغار، لكن ده فى مشاكل قانونية لهم ، وعشان كدة بيقفلوا المحلات التجارية وبيتعذر على التجار الصغار الحصول على السكر من التجار الكبار، وبالتالي السكر بيكون متوفر بس فى مخازن التموين.

طيب سيبك من كل ده وتعالى أقولك ايه اللى حصل لأسعار السكر الايام اللى فاتت .. لو عملنا مقارنه بين سعر السكر انهاردة والاسبوع اللى فات هنلاقى السكر زاد السكر زاد 4.8 جنيه .. طيب ولو عملنا مقارنة لسعر السكر انهاردة والشهر اللى فات هنلاقيه زاد 5.7 جنيه واصبح متوسط سكر السكر المعبأ 46.9 جنيه، وبكدة هيتراوح سعر السكر في الأسواق ما بين 27 جنيهًا و60 جنيهًا.

وزادت أسعار سكر البلورة 6.8 جنيه مقارنة بسعره أمس، ليبلغ متوسط سعر سكر البلورة في الأسواق نحو 32.6 جنيه، ليبلغ سعر سكر البلورة في الأسواق ما بين 20 جنيهًا و45 جنيهًا.

ده مش بس كدة دا سعر سكر الدوحة وفقًا للبوابة الحكومية زاد 1.8 جنيه مقارنة بسعره أمس، ليبلغ متوسط سعر سكر الدوحة نحو 35.6 جنيه، ليتراوح سعر سكر الدوحة ما بين 15 جنيهًا و46 جنيهًا.

ياترى الازمة دى هطول ولا هتبقى عابرة وترجع المية لمجاريها عند السكر ده اللى الايام الجاية هتكشفه