حكاية وفاة عم مسعد.. عاش وحيد ومات غريب وادفن فى مقابر الصدقة بسبب بناته

أعلنت مؤسسة معًا لإنقاذ إنسان وفاة عم مسعد في منشور لها على الصفحة الرسمية الخاص بها :«مـ ات عم مسعد الرجل الطيب داخل الرعايه بالمستشفى . عاش وحيد ومـ ات غريب وادفن فى مقابر الصدقة بسبب بناته !! "إنا لله وإنا إليه راجعون" لله ما أخذ ، وله ما أعطى ، وكل شيء عنده بأجل مسمى ..

كارثة بنتين سلموا والدهم دار مشردين وانكروا معرفتهم بيه !! والسبب ؟؟

وتضمن المنشور:« أو بمعنى ادق الكارثة ايه ؟؟ عم مسعد تم إنقاذه من المحلة الكبرى من سنه ونص تقريبا .. و صلنا نص البلاغ بالظبط الرجل ده مرمى فى الشارع ملوش حد نهائي وتعبان بيموت وعملنا له الخيمة ده علشان تحميه ..

تم الاستجابة ونقله للمؤسسة ومن وقتها وعم مسعد معانا وتحت رعايتنا ما بين المستشفيات والدار لان وضعه الصحي كان سيئ جداً و محتاج رعايه طيبة مستمرة .. و بعد فترة بدأ مجموعة من الأهالي بالمنطقة يتوصلوا معانا بيسالوا عنه وعن أحواله ..

طيب السؤال انتم مين؟؟ احنا جيران عم مسعد .. ليه هو عم مسعد له اهل او اولاد؟؟ الإجابه الصادمة

اه له اخوات وهما اللى رموا فى الشارع بعد ما انفصل عن مراته وله بنتين وهما اللى جابوه الدار بس انكروا نفسهم علشان الاستاذ اللى راح معاهم الدار قالهم لو عرفوا ان له عيال مش هياخدوا منكم

وكمان قال فى الدار لو مـ ات اتصرفوا انتم هو ملوش حد الكلام ده بناته ع علم بيه كله …

وطول فتره وجود عم مسعد عندنا اتحجز فى الرعايه اكتر من مره بننشر بوستات بصوره مفيش واحده منهم قلبها حن ع والدها وجت تشوفه …علشان خايفه نعرف ان له اولاد ..

لدرجه دى انعدمت الرحمه من قلوبهم حسبنا الله ونعم الوكيل وكفى

زي ما انكرتوا نفسكم واتخلتوا عنه وهو عايش هتعرفوا خبر وفاته زي اي حد غريب ع الصفحه …

و حابين نعرفكم انه اتوفى واتغسل وادفن فى مقابر الصدقة ..

عم مسعد فى آخر ايامه كان ملوش حد غيرنا احنا اهله اللى بنخدمه و كنا معاه طول الوقت حتى فى المستشفيات ولما مات كنا آخر ناس يشوفهم واحنا اللى ودعناه ع المقابر ..

"البر لا يبلى، والذنب لا يُنسى، والديان لا يموت، ابن آدم اصنع ما شئت فكما تدين تدان"

نسألكم الدعاء له بالرحمه والمغفره .. اللهم ارحمه واغفرله وآنس وحشته ووسع قبره واجعله روضة من رياض الجنة يارب