والد البلوجر هدير عبد الرازق يفجر مفاجأة: رجل أعمال رفضت الزواج منه وراء إلقاء القبض عليها

قال محمد عبد الرازق، والد البلوجر هدير عبد الرازق، التي ألقت مباحث الآداب القبض عليها بتهمة التحريض على الفسق والفجور ونشر فيديوهات خادشة للحياء، إن ابنته تقوم بعمل الفيديوهات الخاصة بها بهدف التسلية فقط.

وأضاف خلال مداخلة مع الإعلامي سيد علي في برنامج "حضرة المواطن" المذاع عبر قناة الحدث اليوم: "بنتي مكملتش 25 سنة، وشغالة بلوجر للتسلية لا أكثر ولا أقل، وظروفها المادية مستريحة ومش محتاجة يتعمل اللي اتعمل فيها".

وأضاف: "غير صحيح إنهم قبضوا عليها من الكمباوند، هو أخذها من الشارع، واللي سلط عليها رجل أعمال كان عايز يتجوزها ورفضت، وزوجته لما علمت إنه هيتقدم لها ويخطبها عملت فيها كده".

ودافع والد هدير عبد الرازق خلال المداخلة الهاتفية مع البرنامج عن ابنته قائلا: "هي عاملة حوالي ألف فيديو مفيش فيهم حاجة خالص غير فيديوهين وحشين، لكن كل الفيديوهات محترمة وبتطلع بهدومها".

وأضاف: "النهاردة بعد ما اتحقق معاها 11 ساعة اتحبست أربع أيام بناء على إيه، مفيش اتهام ومفيش فيديو يدين، والنيابة لما سألتها إمبارح قالت هو في قانون يمنع إني ألبس لبس عريان؟ يبقى نقوم بالكلام ولا بالحبس؟"

ونفى والد هدير عبد الرازق تقاضيها مبالغ مالية مقابل مقاطع الفيديو الخاصة بها قائلا: "هي مش بتاخد فلوس وأثبتت ده في النيابة، والمنتجات اللي بتعرضها بتاخد حقها كعلاج، وبقالها أكثر من سنة مبطلة، وكل الفيديوهات دي لها سنتين ونص، كانت فين الرقابة سنتين ونص؟"

وألقت الإدارة العامة لمباحث الآداب القبض على البلوجر هدير عبد الرازق، بتهمة التحريض على الفسق والفجور ونشر فيديوهات خادشة للحياء.

ورصدت الأجهزة الأمنية فيديوهات خادشة تحث على الفسق والفجور عبر حسابات هدير عبد الرازق بمواقع التواصل الاجتماعي، وخاصة حسابها على تيك توك.

وهدير عبد الرازق بلوجر مصرية مواليد 1998 أي تبلغ من العمر 26 عاما، تعرف نفسها على أنها ممثلة، وبدأت بنشر فيديوهات على "تيك توك" مع انتشار التطبيق في مصر، وأول فيديو موجود في حسابها على تيك توك منذ عام 2018.

وتنشر هدير عبد الرازق فيديوهات تتحدث فيها عن منتجات تجميل وطرق وضع المكياج، وأحدث صيحات الموضة وتعطي نصائح للسيدات، وبتابعها عبر تيك توك 1.2 مليون متابع.