هند صبري: مش بفرح بنجاحي.. وأشبع الجانب الروحي بالتعبد والقراءة
كشفت الفنانة هند صبري الكثير من جوانب حياتها، وتأثير الثنائيات الحياتية في شخضيتها، مؤكدة أن تجربة الفشل دائما يكون لحكمة.
وقالت صبري في حديثها خلال لقاؤها بإحدى برامج الراديو: "مش هنعرف طعم النجاح بدون تجربة الفشل ودايما بيكون لحكمة، ومش بفرح أوي بنجاحي ودايما بفكر نفسي إن النجاح بيجي بعد تعب كتير فالإحساس بيكون ممزوج بالمسؤولية وأصحابي بيقولولي انتي نكدية".
وأكملت حديثها قائلة: "الخوف من الآخرين بيولد فينا شعور ممكن نفسره بأنه كراهية، وفلسفتي في الحياة إني ميكونش في أحكام مسبقة على حد وأقدم المحبة عشان ألاقيها في المقابل والطريقة دي حققت نتايج ترضيني".
وعن ثنائية الأمان والخوف، قالت: "الأمان والخوف ثنائية لكن هي نفسها الحب والخوف لأن سبب الامان هو وجود المحبة، عمرك ما هتخاف في مكان فيه حب".
وعن ثنائية الحضور والغياب، قالت صبري: "في مهنتنا ثنائية الحضور والغياب، مهمة جدا لأن الغياب كتير مقلق والحضور بكثرة غلط لازم توازن بينهم وده صعب في زمن السوشيال ميديا".
وأكملت حديثها: " الصحة والمرض أهميتها وضحت أكتر بعد أزمة كورونا وبقيت أقدر نعمة الصحة وأسيبها على الله لأن التفكير فيها كتير يسبب خوف وده بيأثر على المناعة وبيعرضنا للمرض".
وعن النقد والمدح، صرحت قائلة: "في مهنتنا مهمة جدا ثنائية النقد والمدح بس مش بتأثر بيهم، ولو الفنان شاف قيمته الفنية مرتبطة بالمدح والجوايز هيبقى طول عمره أسير ليهم، مش بشكر ناقد مدح فيا لأنها مش علاقة شخصية، هو بيأدي عمله وأما بقابلهم بقولهم كده وبيتفهموا ده.. ونفس الشيء، مش بكلم اللي رفض شغلي ومبزعلش".
وأضافت: "مش بحب السلبية، أنا شخص إيجابي لو أقدر أعمل حاجة هعملها، وبحاول في مجالات مختلفة زي الحفاظ على البيئة أو دعم برنامج التغذية
العالمي".
وتابعت: "الجانب الروحى مهم جدا وبشبعه بالتعبد والتأمل والقراءة عن العوالم المختلفة والطب الهندى القديم".
وعن ثنائية الخير والشر، قالت: "الخير والشر موجودين فينا كلنا وأهم ثنائية في الدراما.. الثنائية دي اختيار شخصي تحب تنمى إيه وإزاي تواجه أي نزعة شر بداخلك وتجاهد نفسك، الخير والشر موجودين فينا كلنا وأهم ثنائية في الدراما، الثنائية دي اختيار شخصي تحب تنمى إيه وإزاي تواجه أي نزعة شر بداخلك وتجاهد نفسك".
