ننشر أقوال التربي في واقعة سحر مؤمن زكريا قبل أولى جلسات محاكمة المتهمين

تعقد المحكمة المختصة، غدا الثلاثاء أولى جلسات محاكمة المتهمين في واقعة فبركة سحر مؤمن زكريا.

وونشر نص تحقيقات قضية فبركة السحر والأعمال السفلية للاعب مؤمن زكريا، من أجل تحقيق مكاسب مالية.

واستمعت جهات التحقيق لأقوال التربي - المتهم الأول في واقعة فبركة سحر مؤمن زكريا، والذي قال: اللي حصل أني شغال تربي في مقابر سيدي عقبة في الخليفة، وفي يوم كنت بزرع صبارة في الترب مرة واحدة ووأنا بحفر لقيت كيس بلاستيك فمسكته وفتحته عشان أشوف فيه إيه لقيت فيه لفتين، وبفتح أول لفة لقيت مكتوب فيها طلاسم وحاجات مش مفهومة، واللفة التانية بفتحها لقيت فيها ثلاث ورقات بيض مكتوب عليها كلام مش مفهوم وفيها صورة كابتن مؤمن زكريا، والصورة مكتوب عليها بالأحمر كلام مش مفهوم ومدبس فيها أكثر من دبوس ومكتوب عليها بالأحمر، وساعتها أنا صورتهم بالتليفون محمد جوز أمنية.

وأشار التربي في واقعة فبركة سحر مؤمن زكريا: اتصلت بمحمد. أ قريبي وقلتله على اللى أنا شفته وساعتها هو قالي أنه يعرف حد يوصلنى بالكابتن مؤمن زكريا وبعد كده لقيت واحد اسمه مصطفى ومعاه واحد صاحبه وقالي أنه قریب مرات مؤمن زكريا، وساعتها طلب منى أن يشوف الأعمال اللى أنا شوفتها في المدفن، وأنا وريتهاله وقالي أنه مرات مؤمن زكريا هتتواصل معايا وبعدها بيومين لقيت كابتن مؤمن زكريا واثنين شيوخ وأبو مؤمن زكريا ومصطفى والشيوخ.

وأردف التربي المتهم في واقعة سحر مؤمن زكريا: طلب منى أجيب الأعمال عشان يشوفوها وبعدها قعدو يطلبو مني خل وميه وسلطانية على أساس أنهم بيفكو الأعمال، وبعد كده طلبو مني أنهم يشوفو المكان اللى أنا لقيت فيه الكيس ده وريتهلهم والشيخ طلب منى أحفر شوية كمان وطلع ساعتها من الحفرة اللى جنب التربة حتيتن فخار وسلك وبعد كده حط زرعة الصبار وسقاها بمية مقرى عليها قرآن.

وأضاف المتهم في واقعة سحر مؤمن زكريا: بعد كده هما مشيو لقيت محمد.ع بيقولى أنه صورنا واحنا بنفك العمل وساعتها أنا طلبت منه أنه يمسح أى حاجة صورها عشان مينفعش تتاجر بمرض حد، وبعدين وتانى يوم وأنا رايح أجيب علاج من الصيدلية لقيت الصيدلي بيقولي أيه موضوع مؤمن زكريا قولتله أنه كان فيه أعمال ليه في الترب وفيه شيخ جه فكها وساعتها الصيدلي بيقولى انا مصدقك.

وأكمل المتهم في واقعة سحر مؤمن زكريا بالتحقيقات: ساعتها رحت طلعتله الصور اللى كنت مصورها للأعمال والدكتور ساعتها طلب منى أن أبعتله الصور فبعتهاله بحسن نية، وبعد كده لقيت حد بيتصل بيا وبيقولى أنه هو جارى وبيسألني على موضوع مؤمن زكريا فحكيلته وبعدها على طول لقيت المكالمة اللى كانت بيني وبين الراجل ده ويوم السبت اللي فات لقيت رئيس المباحث بيتصل بيا وبيقولى أنا عند البيت عندك.

وواصل المتهم في واقعة سحر مؤمن زكريا بالتحقيقات: وقالي عاوزك تيجلي حالا وفعلا أنا رحتله عند البيت وقالي أيه ياعم اللى انتا عامله، قلتله أنا معلمتش حاجة وطلب منى انى اوريله مكان الحفرة اللي كان فيها الأعمال وريتهاله وحكلته على كل اللى حصل، وبعد كده راح اخدنى وركبني ميكروباص وطلعنا على قسم الخليفة وفي القسم طلعت وحدة المباحث وفضلت قاعد في المباحث، وبعد كده لقيتهم نزلوني الحجز وبعدها جابونى على النيابة وهو ده كل اللى حصل.