فيفي عبده: أنا متحجبة طول الوقت والرقص مش حرام

ردت الفنانة فيفي عبده على كل من يتحدث عن حرمانية الرقص مؤكدة أن من وجهة نظرها الرقص ليس حراما.

وقالت فيفي عبده خلال لقائها في برنامج "عندي سؤال" من تقديم محمد قيس عبر قناة "المشهد": "الرقص حرام ليه؟ هو مش شغل زي أي حاجة الباليه حرام؟ في حاجات كتير حرام، الرقص دا شغل زي أي شغل ليه احترامه وليه ناسه اللي بيتفرجوا عليه وليه اللي بيقدروه ويحترموه".

وعن فكرة ارتدائها الحجاب قالت فيفي عبده: "أنا متحجبة طول الوقت، الكلام دا يتقال للناس الفالته أنا بعتبر إني محجبة لأني مش بعمل حاجة غلط ومش بجيب في سيرة الناس محجبة في لساني وفي كل تصرفاتي، مطلوب مني إيه أكتر من كده وإذا كان على الشغل لو ربنا قالي في أي وقت إلبسي الحجاب هلبسه".

وتابعت ففي عبده لتكشف لأول مرة عن عدد العمرات التي قامت بها: "أنا عامله 37 عمرة وحجيت 5 مرات، وبقول للناس متشوفوش الظاهر بس اعرفوا أن الفنانين دول عندهم حاجات كتير حلوة إنتوا مش بتقدروها لكن ربنا بيقدرها، أنا لما كنت بروح مكنتش أتكلم مع مخلوق أحط حجابي أروح أصلي صلاتي وأرجع وأخد أهلي كلهم معايا، هيقولوا عاملة دا ورقاصة، أه دي نقرة ودي نقرة هو حساباته غير ويعمل اللي هو عايزة، عملت اللي يرضيني في الحياة ومطمنة جدا حاسه إني هقابل ربنا وأنا مستريحة في أي وقت".

واختتمت فيفي عبده كلامها: "نفسي أقول للناس متبصوش للشكل الظاهري للفنان بصوا لقلوبهم وتصرفاتهم".

يذكر أن آخر أعمال فيفي عبده الفنية كان مسلسل "شغل في العالي" الذي عرض عام 2022، بطولة فيفي عبده وشيرين رضا ومروان يونس، بجانب عدد من ضيوف الشرف من بينهم بيومي فؤاد، ونضال الشافعي، ونجم كرة القدم ميدو، والعمل من إخراج مرقس عادل، وتأليف حسين مصطفى محرم.