قبل جلسة اليوم.. ننشر نشر التحقيقات مع مدرس الفيزياء قاتل الطالب إيهاب أشرف عبد العزيز

تنظر محكمة جنايات المنصورة، اليوم، ثاني جلسات المدرس المتهم بقتل الطالب إيهاب أشرف وتقطيع جثمانه إلى 3 أجزاءه في مركز الستاموني في محافظة الدقهلية.

وتعقد الجلسة برئاسة المستشار مجدي علي قاسم، رئيس محكمة جنايات المنصورة، وتضم الهيئة في عضويتها المستشار وائل صفوت راشد، الرئيس بالمحكمة، والمستشار محيي الدين محمد الكناني، والمستشار وليد نبيل عطوة، وسكرتارية أحمد كمال.

وتستعرض «قضية رأي عام» خلال السطور التالية نشر التحقيقات مع مدرس الفيزياء قاتل الطالب إيهاب أشرف عبد العزيز، حيث قال المتهم محمد عبدالبديع ٢٥ سنة في التحقيقات التي أجرتها نيابة المنصورة: «نفذت الجريمة من أجل الحصول على المال وطلب الفدية من والده علشان أعوض خسائرى في المراهنات.. وقلت والده مرتاح ماديًا وعنده معرض وهو ابنه الوحيد وهيدفع اللى أطلبه منه».

وأضاف: أقنعت الضحية بفكرة تمثيل مشهد على إحدى التطبيقات وان التصوير هيتم باستخدام سكينة وادخلت نصفها في رقبته وسددت له طعنات أخرى في البطن.. وإلى نص التحقيقات

الضحية
س: متى وأين حدثت الواقعة تحديدًا؟

ج: واقعة القتل حدثت يوم 13/2/2024‏ حوالى الساعة 7.15 مساءً في أوضة الدرس اللى أنا مأجرها في الدور الأرضى في قرية 22 الأمل بجوار مدرسة الثانوية وأخفيت الجزء السفلى من جثمان إيهاب بعد ما قطعته ورميته عند كوبرى الخُرس ما بين قرية النقعة وقرية 7 ثابت والجزء العلوى رميته تحت ماسورة مياه جنب المصرف اللى معدى من فوقيه كوبرى الخلايفة والرأس ومتعلقات إيهاب رميتهم عند كوبرى بحر النقعة في آخر قرية 22 الأمل والواقعة كلها بمركز الستامونى.

س: من كان برفقتك آنذاك؟

ج: أنا كنت لوحدى.

س: ما هي طبيعة علاقتك تحديدا بشخص المجنى عليه/ إيهاب اشرف عبدالعزيز عبدالوهاب؟

ج: هو كان طالب عندى وبياخد درس عندى من شهر 10 سنة 2023.

المتهم
س: منذ متى تحديدًا نشأت بينكما تلك العلاقة؟

ج: من شهر 10 لسنة 2023 لما ابن عمته/ كرم الحسن أحمد وده يبقى صاحبى رشحنى له إنه ياخد عندى درس فيزياء.

س: وما هي الأماكن التي كان يتردد عليك فيها المجنى عليه/ إيهاب أشرف عبدالعزيز عبدالوهاب؟

ج: هو كان بياخد عندى درس يومى السبت والثلاثاء فيزياء في أوضة الدرس في قرية النقعة وكان بياخد عندى درس كيمياء يومى الأحد والأربعاء في سنتر في قرية المركزية.

س: وما هي آخر مرة تردد عليك المجنى عليه/ إيهاب أشرف عبدالعزيز عبدالوهاب؟

ج: هو آخر مرة كان عندى يوم الواقعة يوم 13/2/2024‏ لما أنا قتلته في أوضة الدرس اللى في قرية النقعة.

الأهالى أثناء تشييع جثمان الضحية
س: ومتى انتويت تنفيذ جريمتك بقتل المجنى عليه/ إيهاب اشرف عبدالعزيز عبدالوهاب تحديدا؟

ج: أنا الفكرة دى جتلى قبل يوم الواقعة بحوالى أسبوع ومكنتش لسه محدد إن أنا هقتل إيهاب وأطلب فدية من أهله بس قبل يوم الواقعة بحوالى أربعة أيام تحديدا يوم الجمعة 9/2/2024 فكرت إن أنا أقتل إيهاب وأطلب فدية من أهله وحاولت إن أنا أنفذ الكلام ده يوم السبت وقعدت أهزر معاه بالسكينة اللى أنا كنت شاريها وهو بياخد عندى درس بس خوفت بينى وبين نفسى أنفذ وأقتله وبعد لما ابن خالى قابلنى يوم الاثتين وسألنى عن الفلوس والأرباح اللى كان معاده ياخدها في شهر يناير 2024 فأنا قولت إن أنا لازم بكرة أنفذ مع إيهاب علشان ألحق أطلب فدية ويلحقوا يبعتوهالى علشان أديله الفلوس بتاعته وألحق أسدد الديون اللى على.

س: وما الباعث على ارتكابك لتلك الجريمة بقتلك المجنى عليه/ إيهاب أشرف عبدالعزيز عبدالوهاب؟

ج: أنا كنت بمر بضائقة مالية بسبب إن أنا ضيعت فلوسى في تطبيق مراهنات اسمه «one xbet» وكنت سالف فلوس من جماعة قرايبى وكنت مفهمهم إن أنا هشغل فلوسهم في تجارة الموبايلات مع واحد صاحبى مقابل أرباح أعلى من أرباح البنوك بس الحقيقة أنا كنت براهن بيهم في التطبيق ده وخسرت الفلوس دى وخسرت الفلوس اللى أنا كنت محوشها، وكان فيه ناس زى ابن خالى له فلوس مستحقة في شهر يناير 2024 وبقية الناس فلوسهم في أغسطس وأنا لما حسبتها لقيت إن أنا مش هقدر أوفى بالفلوس دى فقررت إن أنا أخطف وأقتل وأطلب فدية علشان أسدد ديونى وأبدأ من جديد بعد ما حذفت تطبيق المراهنات ده لحد ما استقريت على إن أنا أقتل إيهاب.

والد المجنى عليه
س: وما هي جملة المبالغ التي قمت بالاستحصال عليها من أقاربك وذويك آنذاك؟

ج: أنا أخدت مبالغ على فترات متقطعة من عمى تقريبا حوالى 140 ألف جنيه ومن ابن خالى مبلغ حوالى 15 ألف جنيه ومن مرات عمى مبلغ 36 ألف جنيه تقريبا، ومن ابنها مبلغ حوالى 22 ألفا ومن مرات عمى التانية مبلغ 64 ألف جنيه والاتفاق إن بداية تسليمهم الأرباح على فترات لحد شهر 8 وكنت مفكر إن أنا لما أراهن هقدر إن أجيب نسبة الأرباح لأن كنت في بداية اللعبة كنت بحقق نسبة أرباح كبيرة بس تانى يوم كنت بخسرهم وبعدين حسبت مع نفسى دخلى من شغلى في الدروس الخصوصية لحد ما يجى شهر 8 لقيت نفسى مش هقدر أوفى بكل الأرباح بتاعة الفلوس اللى أنا أخدتها من قرايبى بالإضافة إلى أن ابن خالى كان ميعاد استلامه للفوس كان في شهر يناير وكان المفروض المبلغ اللى هيستلمه حوالى 27 ألف جنيه.

س: وما هي الوسيلة التي استخدمتها في إقناع سالفى الذكر لمنحك تلك المبالغ آنذاك؟

ج: أنا فهمتهم إن أنا هشغل فلوسهم في أرباح الهواتف المحمولة وهرجعلهم فلوسهم بالأرباح وقبل كده أخدت من عمى ومرات عمى مبالغ بسيطة زى 2000 جنيه ورجعتهلهم بعد 10 أيام الألف عليه 150 جنيه فهما حسوا إن الموضوع مريح.

الأهالى أثناء تشييع جثمان الضحية
س: ومتى تولدت لديك فكرة ذلك الباعث تحديدا؟

ج: ده كان تقربيا قبل ارتكاب الواقعة بأسبوع وقبلها بأربعة أيام يوم السبت أنا كنت ناوى أقتله وهو عندى في الدرس وبعدين معرفتش أجيبها إزاى وخوفت بس يوم الثلاثاء 13/2/2024 قتلته وقطعته أجزاء ورميته علشان أخفى معالم الجثة.

س: وما هو طبيعة تطبيق «one xbe» تحديدا؟

ج: هو تطبيق وموقع إلكترونى للمراهنات نزلته من على جوجل كروم وهو عبارة عن مجموعة من المراهنات اللى بتم على ماتشات كورة أو أي رياضة من الرياضات اللى بتتذاع أو عدد الأهداف اللى يتتسجل وبيحاكى فيها الواقع وجوة التطبيق فيه ألعاب تانية زى الكوتشينة والدومينو على نفس التطبيق ده وأنا كنت بلعب لعبة اسمها (سكراتش كارد) ودى عبارة عن بخدش كارت بطريقة معينة وفيها نسبة كبيرة من الحظ ولو طلع التطابق رأسى أو أفقى أو مائل ده معناه مكسب وفى حالة الاختلاف بيكون خسارة وبربط الحساب بتاعى على التطبيق بالحساب بتاعى على فودافون كاش وببدأ أراهن بجزء من المبالغ اللى على حسابى ولما بكسب بينزلى المكسب على حسابى فودافون كاش.

الأهالى أثناء تشييع جثمان الضحية
س: هل فكرت في روية من أمرك وعقدت العزم على قتل المجنى عليه إيهاب أشرف عبدالعزيز؟

ج: ايوة علشان أنا مكنتش شايف ليها حل غير إنى أخطف حد وأقتله وأطلب فدية.

س: ولماذا أصريت تحديدا على ارتكاب جريمة القتل ولم تلجأ لأى جريمة أخرى تتحصل من خلالها على أموال؟

ج: علشان أنا كنت شايف إن مفيش حد أسرقه مثلا ولو خطفت حد وطلبت فدية هتكشف ومليش في المخدرات ولا أعرف سككها.

س: ولم استقريت على تحديد شخص المجنى عليه/ إيهاب اشرف عبدالعزيز عبدالوهاب لتنفيذ جريمتك آنذاك؟

ج: علشان أنا أعرف إن إيهاب أبوه مرتاح ماديا وعنده مصنع سيليكون ومعرض أدوات منزلية وإيهاب هو الولد الوحيد على بنات وقولت إن أكيد أبوه هيدفع فلوس كتير.

الأهالى أثناء تشييع جثمان الضحية
س. وما هو مخططك تحديدا لتنفيذ جريمتك محل الواقعة؟

ج: أنا قررت إن أنا اقتل إيهاب وهو عندى في الدرس بسكينة كنت اشتريتها من معرض أدوات منزلية في بداية قرية النقعة من ناحية قرية البنزينة وبعدها أخفى ملامح جثته وتطول مدة العثور عليها وأطلب فيه فدية وأوهم أهله إن هو لسه عايش علشان لو مكنتش قتلته مكنتش هعرف أخفيه ولو حتى كنت خفيته كان لازم أستعين بحد من بره البلد أقدر أئتمنه ومكنش فيه حد في دماغى وكده كده كانوا هيجيبونا من تتبع التليفونات.

س: وما سبب اختيارك لتوقيت يوم الثلاثاء الموافق 13/2/2024 كزمان لارتكاب الواقعة واختيارك لمكان الدرس كمان لتنفيذ تلك الجريمة محل الواقعة تحديدا؟

ج: علشان مكنش قدامى يوم تانى غير السبت أو الثلاثاء علشان دى الأيام اللى إيهاب بيقعد فيها معايا في المجموعة لوحده وأغلب الأوقات بعد ما بنخلص الدرس بنقعد نلعب شوية بلايستيشن واختارت المكان ده لأنه مكان مقفول طبيعى إنه يقعد معايا فيه لوحده إنما لو كنت أخدته في مكان تانى كان ممكن حد يشوفنا أو يقعد يسألنى إحنا رايحين المكان ده ليه.

س: وهل شاركك أحد في ارتكاب جريمة قتل المجنى عليه/ إيهاب أشرف عبدالعزيز عبدالوهاب بأى وسيلة من وسائل الاشتراك بتحريضك على ارتكابها أو إمدادك بأى من الأدوات أو المعلومات المجهزة أو المسهلة أو المتممة لارتكابها أو اتفق معك على ارتكابها؟

ج: لا الفكرة بتاعتى وأنا اللى نفذتها لوحدى.

س: ما هي الأدوات التي استعنت بها واستخدمتها في ارتكاب جريمتك؟

ج: أنا استخدمت سكينة واستخدمت الشكارتين واحدة بيضاء وواحدة زرقاء استخدمت شكاير خيش اللى بيتحط فيها القطن واستخدمت كرتونة كبيرة وأكياس بلاستيك من بتاعة الزبالة ومناديل تنظيف والحبل كان في الشوال.

س: وما هو وصف تلك الأدوات تحديدا؟

ج: هي سكينة مقبضها خشب لونه بنى فاتح والنصل بتاعها محمل وحامى طولها حوالى 10 سم والشكاير الخيش من اللى بيتخرن فيها القطن لونها بنى مخرمة كانت موجودة في سقف أوضة الدرس كان المدرس اللى قبل منى مأجر الأوضة وكان معلقها على السقف عشان يدارى التشققات اللى فيها وفيه شيكارتين من اللى بيخزن فيهم الأرز واحدة لونها أزرق فاتح والتانية لونها أبيض وكان كل واحدة فيهم فيها دوبارة حبل والكرتونة كانت بتاعة مروحة قديمة موجودة في الدرس عندى طولها والأكياس البلاستيك السودة من بتاعة الزبالة والمناديل الورق العادية.

س: ومن أين استحصلت على تلك الأدوات؟

ج: السكينة أنا اشتريتها من معرض أدوات منزلية في أول قرية النقعة من ناحية قرية البنزينة والأكياس البلاستيك والشكاير كانوا موجودين في أوضة الدرس والمناديل إيهاب كان جايب علبة وهو جاى الدرس وأنا كنت جايب علبة.

س: وما هي بادرة لقائك بالمجنى عليه/ إيهاب أشرف عبدالعزيز عبدالوهاب يوم ارتكابك الواقعة محل التحقيق؟

ج: هو كان بياخد عندى درس فيزياء مع طالبتين وبعد ما خلص درس الفيزباء الساعة 6.20 مساء طلب منى إن أشرحله درس كيميا فشرحتله بسرعة وقعدنا نلعب بلاى ستيشن وفى الفترة دى أنا كنت بفكر إزاى أخلص منه فكنت بحاول أطول في اللعب لحد ما والدته اتصلت بيه مرتين مرة ما بين درس الفيزياء والكيمياء، والمرة التانية كانت بتشوفه هو فين وبتستعجله عشان يروح، فساعتها لما قام يروح طلبت منه إن هو يصور معايا مقطح فيديو بتليفونى فيه خدعة مونتاج من اللى بتستخدم في أفلام السينما والمسلسلات.

س: وما هو مضمون الحوار الذي دار بينك وبين المجنى عليه/ إيهاب أشرف عبدالعزيز قبل ارتكابك للواقعة؟

ج: أنا فهمته إن أنا عرفت خدعة مونتاج من اللى بتستخدم في أفلام السينما والمسلسلات وإديته مثال وقولتله إن أنا ممكن أحط السكينة على رقبته بظهرها وأصور اللقطة دى بمقطع فيديو وأحطه على اللاب واستخدم برنامج في خدع المونتاج ويظهر الفيديو بعدها وكأنه واحد مدبوح حقيقى وبينزل منه دم وهو وافق على طول.

س: وهل كنت تعتقد أن المجنى عليه/ إيهاب اشرف عبدالعزيز عبدالوهاب سيجيب بالموافقة على طلبك؟

ج: أيوة لإن أنا عارف إيهاب من فترة وبينا هزار مع بعض وبنلعب بلاى ستيشن مع بعض.

س: وما هي كيفية ارتكابك الواقعة تحديدا؟

ج: أنا بعد ما أقنعت إيهاب إن أنا ممكن أحط السكينة على رقبته علشان نعمل فيديو فيه خدعة مونتاج هو سابلى نفسه وقالى خلى السكينة بظهرها لأحسن تعورنى وساعتها أنا مسكت بوقه بإيدى اليمين وجبت رأسه على الجنب وخبطته خبطة جامدة في رقبته تعتبر إن نصف السكينة دخلت في رقابته وساعتها هو جسمه ساب وشوية وحاول يسترجع قوته ويعافر وبعد كده إيديه راحت سايبة وأنا ماسكه وبعدها لقيته بدأ يثبت ويقاوم أكتر فضربته ببوز السكينة في بطنه من الناحية الشمال جنب السرة فهو إيده اليمين اتعورت وأنا بخبطه بالسكينة وبعدها وقع على الأرض بس كان لسه فيه الروح لأن هو قدر يزق إيدى من على بقه وكان بيحاول يقول إلحقونى بس صوته مكنش عالى أوى فأنا خوفت إن حد يسمعه وإن حد يكشفنى فقمت خابط ركبتى في دماغه خبطتين وهو واقع على الأرض وبعد الخبطة دى هو ساب خالص وما اتحركش تانى.

س: وما هي عدد الضربات التي كلتها للمجنى عليه/ إيهاب أشرف عبدالعزيز عبدالوهاب وطبيعتها وأين استقرت تحديدا؟

ج: أنا ضربته ضربة بالسكينة في رقبته من الناحية الشمال ببوز السكينة دخلت نصها في رقبته وضربة تانية كانت في بطنه من الناحية الشمال وأنا غرزت السكينة تقريبا كلها وأنا بضربه بالسكينة في بطنه إيده اليمين اتعورت ما بين أصبعى الإبهام والسبابة عشان هو كان بيحاول يحوش السكينة ولما وقع كنت لسه حاطت إيدى على بوقه فلقيته بيحاول يسحب إيدى وبيحاول يستغيث فقمت نازل عليه بركبتى مرتين على دماغه لحد ما قطع النفس.

س: وهل حاول المجنى عليه/ إيهاب أشرف عبدالعزيز عبدالوهاب مقاومتك أو الاستغاثة آنذاك؟

ج: أيوه هو حاول.

س: وما هي مظاهر تلك المقاومة والاستغاثة؟

ج: هو حاول يزق إيدى من على بوقه بس أنا كنت ماسكه جامد وحاول إنه يحوش السكينة وأنا بضربه في بطنه بس هي جت على إيده اليمين عورته بجرح ولما وقع على الأرض وإيدى فلتت من على بوقه قعد يستغيث ويقول إلحقونى وساعتها أنا نزلت عليه بركبتى مرتين لحد ما قطع النفس.

س: وهل استجاب أي من الأشخاص آنذاك لاستغاثة المجنى عليه سالف الذكر؟

ج: لا هو كان بيقول إلحقونى بصوت متوسط مش عالى أوى وأنا كنت قافل الباب علينا من جوه وعشان يفتح من بره لازم يكون فيه مفتاح.

س: وهل الوحدات السكنية الكائنة بالعقار محل الواقعة يقطنها ثمة أشخاص إبان ارتكابك الواقعة؟

ج: آه المكان كله فيه ناس ساكنة من الأهالى بس مفيش حد سمع أو حس بحاجة.

س: ثبت من مناظرة النيابة العامة للجزء العلوى من الجثمان دون رأس من جثمان المجنى عليه/ إيهاب أشرف عبدالعزيز عبدالوهاب وجود قطع طولى بالظهر أسفل الكتف من الناحية اليمنى من الخلف بالقرب من مفصل الذراع الأيمن فمن محدث ذلك الجرح الإصابى؟

ج: أنا اللى عملته.

س: وما سبب وتوقيت إحداثك لذلك الجرح الإصابى الوارد ذكره؟

ج: أنا كنت بحاول أحطه جوه الكرتونة بس الكرتونة كانت بتتفتح من الجانب فأنا حاولت أقطع الذراع زى ما قطعت الرأس.

س: وما الذي حال دون ذلك؟

ج: أنا حسيت إنه هياخد وقت جامد منى والمنطقة دى في الجسم فيها عظم جامد في المفصل وأقوى شوية من العامود الفقرى.

س: وهل من ثمة آثار دماء المجنى عليه/ إيهاب أشرف عبدالعزيز عبدالوهاب لطخت بها ملابسك حال ارتكابك للواقعة؟

ج: أيوه فيه دم جه على البنطلون الجينز على الرجل اليمين أعلى الركبة والكوتشى بتاعى جه عليه دم من جانب وأسفل النعل والكم بتاع السويتشرت من ناحية الشمال جه عليه نقط دم.

س: وما الذي بدر منك حيال تلك الدماء التي استطالت ملابسك آنذاك؟

ج: أنا كان فيه إزازة مياه مسحت بيها البنطلون والسويتشرت والكوتشى لما مشيت بعد كده في الشارع جه عليه تراب واتمسح.

س: وما التصرف الذي بدر منك عقب إجهازك على المجنى عليه/ إيهاب أشرف عبدالعزيز عبدالوهاب وتثبتك من إزهاق روحه؟

ج: هو لما كان واقع على الأرض في الأوضة أسفل السبورة كان ظهره للسبورة ووشه ناحية الحجرة وكان على جانبه فأنا سبته على جنبه وبدأت إن أفصل جسمه علشان أقدر أحطه في الشكاير وفى الكرتونة اللى أنا كنت عارف إن هما موجودين في الأوضة وكنت ناوى إن أنا استخدمهم في إخفاء الجثمان.

س: ما هي الكيفية التي استخدمتها في التخلص من جثة المجنى عليه/ إيهاب أشرف عبدالعزيز عبدالوهاب عقب إجهازك عليه؟

ج: أنا لما اتأكدت إن هو مات بدأت أقطع الهدوم بتاعته لإن لقيت حجمه كبير وقررت إن أنا أقطع الجثمان واستخدمت نفس السكينة اللى أنا قتلته بيها وبدأت أقطعه من الجانبين بشكل دائرى لحد ما وصلت للعامود الفقرى وساعتها قلبته على وشه وحطيت السكينة بين فقرة من فقرتين العامود الفقرى وفضلت أدوس على ظهر السكينة برجلى لحد ما كسرت العظمة بتاعة العامود الفقرى وفصلت الجثمان لنصفين وبعد كده لما جيت أحط النصف العلوى في كرتونة فلقيت رأسه ظاهرة من الكرتونة فقررت إن أفصل رأسه فرحت ماسك السكينة وبشكل دائرى لحد ما فصلت رأسه وكده قسمت الجثمان ثلاثة أجزاء الجزء السفلى ربطت رجليه الاتنين من الخلف بحبل دوبارة بتاعة الشيكارة الخيش في الحزام اللى كان لابسه إيهاب وحطيته في الشيكارة الخيش البنى وبعدين حيطته جوه الشكارة البيضاء البلاستيكية وبعدين حطيته جوه الشيكارة الزرقاء وربطت الشيكارة بدوبارة من بتاعة الشيكارة الخيش والجزء العلوى من الجثمان عقب فصل الرأس فرشت الكرتونة بأكياس زبالة سوداء ولما جيت أحط فيها الجثة عقب فصل الرأس لقيت إن الذراع اليمين هيخرج بره الكرتونة فأنا حاولت إن أنا أقطعه بس لقيته هياخد وقت كبير فحطيت الجزء العلوى من غير الرأس زى ما هو وحطيت الرأس في كيس أسود وحطيتها جوه الكرتونة وقفلتها بالغلاف بتاعها وقفلتها بجزء من الحبل الباقى من الشيكارة البلاستيك.

س: وما الذي بدر منك عقب ذلك؟

ج: أنا بدأت أنضف الملابس بتاعتى والأرض والسكينة منضفتهاش ورميتها زى ما هي في المصرف.

س: ما هي الفترة الزمنية المستغرقة منذ بداية تعديك على المجنى عليه/ إيهاب أشرف عبدالعزيز وإزهاق روحه؟

ج: الموضوع ده أخد حوالى 10 دقائق.

س: ما هي الفترة الزمنية التي استغرقتها في تقطيع جثمان المجنى عليه لإخفاء آثار جريمتك؟

ج: الموضوع ده أخد حوالى 20 إلى 30 دقيقة.

س: متى انتهيت تحديدًا من ارتكاب جريمتك؟

ج: حوالى الساعة 8 إلى 8.05 مساء.

س: وهل ورد إليك ثمة اتصالات من ذوى المجنى عليه/ إيهاب أشرف عبدالعزيز عبدالوهاب للاستفسار عن مكان تواجد نجلهم وما هو عددها؟

ج: في الوقت ده أنا كنت في الأوضة ووالدته كلمتنى على تليفونى مرة واحدة وسألتنى عنه وقولتلها إن هو خرج من ساعة ما إنتى كلمتيه وغالبا هو ممكن يكون راح الإسكيت واتصلت على رقمه هو وأرقام تانية بس أنا كنت بكنسل.

س: وما هي كيفية تخلصك من متعلقات المجنى عليه/ إيهاب أشرف عيد العزيز عبدالوهاب؟

ج: أنا حطيتهم معايا في جيبى وبعد كده رميتهم مكان ما رميت السكينة في ترعة النقعة آخر قرية 22 الأمل بس مش كلهم في كيس واحد.

س: ما هي كيفية تخلصك من أجزاء جثمان المجنى عليه/ إيهاب أشرف عبدالعزيز عبدالوهاب وما الطريق الذي سلكته للوصول للمكان محل ذلك؟

ج: أنا خرجت من البيت وأخدت الكرتونة اللى فيها الجزء العلوى من الجثمان والرأس وحطيتهم قدامى على الموتوسيكل ومشيت في طريق رئيسى اسمه النقعة بصار لحد ما وصلت لكوبرى ما بينهم اللى هو كوبرى الخلايفة وبعد كده حودت شمال لحد ما وصلت للكوبرى اللى بعده وده اللى حطيت فيه الجزء العلوى على أحد جانبى المجرى المائى فوق الماسورة ورميت الرأس في نصف الترعة وبعد كده رجعت تانى من نفس الطريق لحد أوضة الدرس وبعدين جبت الشكارة اللى فيها الجزء السفلى وحطيته على الموتوسيكل وروحت في طريق لما وصلت لكوبرى النقعة وبعدين لفيت من ورا البلد من آخر قرية 22 الأمل لحد ما وصلت للأسفلت عشان ما أبانش إن أنا رايح لطريق الدرس مباشر وبعد كده دخلت في طريق كوبرى الُخرس وهناك بعد الكوبرى بحوالى كيلو رميت الشيكارة اللى فيها الجثمان السفلى ما بين المنصل والأرض الزراعية ورجعت تانى من نفس الطريق على أوضة الدرس علشان أجيب المتعلقات بتاعته والحاجات بتاعتى وأخدت الحاجات على الموتوسيكل وطلعت على طريق بحر النقعة آخر قرية الأمل ورميتهم هناك.

وكان قرر المستشار محمد هاشم، المحامى العام لنيابات شمال المنصورة الكلية، إحالة مُدرس الفيزياء المتهم بقتل الطالب «إيهاب أشرف عبدالعزيز»، للمحاكمة الجنائية العاجلة، وحدد جلسة 20 مارس المقبل أولى جلسات المحاكمة.

وجاء في قرار إحالة المتهم لمحكمة الجنايات، وذلك في القضية رقم 1041 لسنة 2024 جنايات الستامونى، والمقيدة برقم 153 لسنة 2024 كلى شمال المنصورة، أن النيابة العامة تتهم «محمد ع.ال.ع.ال» (محبوس)، 25 سنة، طالب بكلية التربية قسم فيزياء جامعة المنصورة، لأنه في يوم 13/2/2024 بدائرة مركز الستامونى- محافظة الدقهلية، قتل المجنى عليه الطفل «إيهاب أشرف عبدالعزيز عبدالوهاب»، عمدًا مع سبق الإصرار، بأن عقد العزم وبيت النية على إزهاق روحه، وأعد لذلك الغرض سلاحا أبيض سكينا، وتحين تواجد المجنى عليه لديه لتلقى مادة علمية، وإمعانا منه في سلب مقاومته احتال عليه بأن أوهمه بقدرته على تصوير مقطع مرئى فيما بينهما، يقوم فيه المتهم بتمرير نصل السكين على عنق المجنى عليه دون إصابته، ويدخل عليه بعض الخدع البصرية، ليظهر عقب ذلك وكأن الدماء تسيل منه، فامتثل له مستغلا وجود ثقة بينهما لا تجعله يحتاط إزاءه، كونه معلما له، وما أن ظفر به حتى باغته بالتعدى عليه بسلاحه الأبيض، طعنا بعنقه وأسفل صدره، فأحدث إصاباته الموصوفة بتقرير الصفة التشريحية، والتى أودت بحياته، على النحو المبين بالتحقيقات.

وقد ارتكبت تلك الجناية تأهبا لارتكاب جنحة، هي أنه في ذات الزمان والمكان أنفى البيان، شرع في الحصول على مبلغ نقدى من المجنى عليه «أشرف عبدالعزيز عبدالوهاب عبدالعزيز»، بطريق التهديد، بأن زعم خطف نجله طالبا منه فدية مقدارها 500 ألف جنيه مصرى، مهددا إياه بإيذائه إن لم يمتثل لطلبه، إلا أنه قد خاب أثر ذلك لسبب لادخل لإرادته فيه، وهو ضبطه، كما أحرز سلاحا أبيض- سكين- دون مسوغ قانونى أو مبرر من الضرورة المهنية أو الحرفية.

وأكد تقرير الصفة التشريحية الخاص بالطالب «إيهاب أشرف»، ضحية مُدرس الفيزياء، أن الجزء السفلى من الجثمان تم فصله من عند مستوى السرة تقريبًا، بجرح قطعى غير حيوى، ومثله يحدث من نصل صلب حاد أيًا كان نوعه. وأضاف التقرير، أن الرأس والجزء العلوى من الجزع والطرفان العلويان، تبين من الآثار الإصابية الحيوية الحديثة الظاهرة، وجود جرحين طعنيين بكل من العنق وأسفل يسار مقدم الصدر، وكل منهما يحدث من الإصابة بنصل صلب حاد مدبب الطرف، أيًا كان نوعه، وهى جائزة الحدوث من مثل التعدى على المجنى عليه بمثل حرز السكين المضبوط، كالتصوير الوارد بالتحقيقات، وفى تاريخ معاصر لتاريخ الواقعة.

كما تبين وجود فصل غير حيوى كامل للرأس عن الجزع بأعلى منطقة العنق، ومن منطقة الجزع بالجزء السفلى، وكذا فصل جزئى للطرف العلوى الأيمن عن الجزع بجروح متطابقة ومستوية الحواف، ومشرزمة في بعض مواضعها، وكل منها يحدث من الإصابة بنصل صلب حاد أيًا كان نوعه، وهى جائزة الحدوث من مثل حرز السكين المضبوط كالتصور الوارد في التحقيقات.

وكشف التقرير أن وفاة المجنى عليه إصابية وتعزى إلى الإصابة الطعنية بالعنق، محدثة تهتك في الأوعية الدموية العظمية مقابلها، أدت إلى نزيف دموى شديد وهبوط حاد بالدورة الدموية والتنفسية انتهت بالوفاة، وأن قطع الخيش المضبوطة بمحل الواقعة تتطابق وتتكامل مع القطع المعثور عليها مع النصف السفلى للجثمان.