سرق مني 10 ملايين جنيه.. القصة الكاملة لأزمة شيرين عبد الوهاب مع حسام حبيب

تصدرت الفنانة شيرين عبد الوهاب التريند خلال الساعات القليلة الماضية، وذلك بعد تصريحاتها الأخيرة بشأن أزمتها مع المطرب حسام حبيب واتهامها له بسرقة 10 ملايين جنيه.

وقالت شيرين عبد الوهاب خلال تصريحات صحفية سابقة: حسام حبيب أخد مني 10 ملايين جنيه مقابل إنه يمسك إيدي ويطلعني المسرح، ويركب طيارات خاصة ويتخانق فيها، أنا كل شوية بتعاير بالفلوس دي، أنا عايز الفلوس لا مش عايزها، كلمني وقالي مش عايز الفلوس دي وهرجع الاستوديو، طب خدتها ليه واتعملك شيكات بيها ليه؟.

وتابعت شيرين: عشان أنت بتعاير وبتقول كلام أنا بس اللي أعرفه ولكن الناس مش عرفاه، المحاسب عنده ما يثبت إن له 600 ألف جنيه دولار و3 ملايين جنيه عشان كده اتقال الرقم كله بالمصري، ومعاه شخص نصاب عينه يكون مسؤول عن حاجات كتير.

وأضافت: وهو ده اللي سرق العربية والخزنة بتاعتي مش حسام، وبعت لحسام فويس قولتله أنا غلطانة في موضوع الخزنة لأني أنا اللي أهملت ومش هحاسبك على الخزنة أساسا، لقيته بيكلمني بيقولي هو أنتي اتسرق منك دهب، قولتله اه، قالي أنتي عارفه إن الشخص ده اشترى لأمي وباعلها عربية بدون ورق، واداله مليون جنيه بتاعت الحلقة اللي عملها في رمضان فجاي يحاسبه على شغله لقى إن حسام مديون له بـ170 ألف جنيه مصري.

وبعد هذه التصريحات، وجه شقيق شيرين عبد الوهاب رسالة لها هي وطليقها حسام حبيب حيث كتب عبر حسابه الشخصي بموقع التواصل الاجتماعي فيسبوك: يا شيخة والله ربنا ياخدنا بقي عشان نرتاح من القرف ده، كفاية بقي أقسم بالله قرفنا والناس قرفت واشمأزت منكم أنتو أقذر قصة عرفتها البشرية والله حسبي الله ونعم الوكيل فيكم أنتو الإتنين.

ورد حسام حبيب على هذه الاتهامات من خلال تسجيل صوتي في برنامج Et بالعربي، حيث قال: طبعًا أنا فاهم جدًا اللي بيحصل، ومش عارف أقول إيه للناس طبعًا، والناس عندها حق تزهق، بس والله العظيم ده مش أنا والتصرفات دي أنا بريء منها تمامًا، أنا مستغرب أكتر منكم باللي بيحصل، بس ممكن يكون ده حصل عشان هي بقالها يومين أو تلاتة بتحاول تتصل بيا وأنا رفضت بعد الأحداث الأخيرة رفضت تمامًا وقولت خلاص مش هينفع كل مرة أني أسامح ومع ذلك ما تكلمتش والنتيجة هي هي برضه وطبعًا كل دي حاجات يحاسب عليها القانون وكل دي اتهامات كاذبة، وبإذن الله مش هرجع في كلامي والمرة دي القانون هو اللي هياخد مجراه.

وأضاف: وموضوع التحويل المالي ده يا أما حاجة من الاتنين يا إما أنا لسه جوزها وبكدب على الناس يا إما بتكدب على البنك يا إما هي بتدلعني بقى، وفي حد يخلي حد يدفع فلوس غصب عنه ومش عارف أقول إيه الصراحة؟، واللي بيقولوا أنا سرقت خزنة وسرقت تحويل بنكي خدتهم إزاي بقى، كنت شبح جوه البنك ولا لبست طاقية الاخفاء ودخلت البنك وسرقت الخزنة، وكل مرة سرقة وكلام أقل بكتير من أني أعلق عليه هو إيه أنا شيخ منصر كل شوية اكسر خزنة ومحدش قادر عليا يعني، لا يا جماعة أنا تعبت أنا بقى اللي بستنجد بالناس وبكل حد يقدر يساعدني في حاجة زي كده وكل الناس المحترمين في الوطن العربي ارحموني منها ده ذنب أنا عملته في حياتي معرفش إيه ده.

وتابع: وأنا لسه هطلع أتكلم بكل التفاصيل وده مش تهديد ومش بقول كده عشان أخوفها ولا حاجة، لكن ده حقي وبقالي سنين مش عايز أخده وعمالين يتكلموا على سمعتي وسمعة أهلي وأنا الحمد لله متربي كويس ومن عائلة كويسة جدًا، ومتعلم في أماكن كويسة جدًا وبعرف ربنا سبحانه وتعالى، واللي بيخاف ربنا ميعملش كده ومعتقدش أن في حد يعرف ربنا يعمل كده، وعاوز أفهم يعني إيه سرقت تحويلها البنكي؟، الاتهام ده عبارة عن ايه يعني.

واستكمل: وهي بتستقوى بالناس وبتستقوى باللي ربنا ادهولها على الناس وهي دايمًا تهددني لو ماردتش هعمل كذا، ومش هعرف أخليك تمشي في الشارع ويا جماعة أرجوكم ما تبقوش سلاح في إيد حد بيظلم حد وعايز يجبره على حاجة هو مش عايزها.

فخرج محمد شقيق شيرين عن صمته ووجه رسالة لطليقها المطرب حسام حبيب، وكتب محمد عبد الوهاب عبر حسابه بموقع التواصل الاجتماعي الشهير فيسبوك: أنت يابن الجزمة طالع تقول أنا متربي وعيلتي أحسن ناس ده أنت أمك اتطردت قدامك الساعة ٤ الفجر بعد ٣ أيام جت البيت عندها هي وأختك عادي وكأن مفيش حاجة حصلت زيرو كرامة بالوراثة.